Biryani, Beer Aur Bhootiya Flat – Ek Roommate Ki Darr Bhari Dastaan

 

Lucknow ke ek shaant se colony mein do IT professionals ki zindagi shanti se chal rahi thi... jab tak ek lipstick aur ek bhoot ne sab kuch badal nahi diya. Yeh kahani hai dosti, biryani aur chaddi-baniyan mein horror ka! Padhiye meri pehli horror-comedy story – Lipstick Wali Aatma.

------------------------------------------------------------------------

Lucknow ke ek shaant se colony mein, mera ek dost apne roommate ke saath ek 2BHK flat mein rehta tha. Dono IT company mein kaam karte the, din bhar office ki tension aur raat bhar memes, biryani aur beer se stress mitaate the. Zindagi badi shanti se chal rahi thi… jab tak ek shaam kuch ajeeb hone na laga.

Us din mera dost jaise hi office se flat par aaya, usne dekha ki drawing room ki diwar par laga sheesha toot gaya tha. Thoda hairaan toh hua, par socha – “Chal koi baat nahi, shayad dost se gir gaya hoga.” Bina kuch bola, ignore kar diya.

Thodi der baad roommate aaya. Dost ne casually pucha, “Sheesha kaise toota?”
Roommate bola, “Pata nahi yaar, puraana hoga... khud hi gir gaya hoga.”
Phir dono ne socha – “Chalo, chhodo... kya khayenge aaj?”

Roommate proudly bola, “Aaj biryani restro se leke aaya hoon!”
Par jaise hi dabba khola... biryani se ek ajeeb sa smell aaya. Biryani sad chuki thi.

Mood waise hi sad ho gaya. Restro ko yaad karke gaaliyan dete rahe, par pet toh bhooka tha. Fir socha – “Chalo, khichdi hi bana lete hain.”
Khichdi bani, cooker khula… aur ye kya? Khichdi bhi sad ho chuki thi.

Ab dono ko laga – “Yeh kya ho raha hai? Ye koi coincidence nahi ho sakta.”
Tabhi… bulb flicker karne laga.
Room mein halki thand si mehsoos hone lagi.

Dono ne ek dusre ki taraf dekha, fir bola – “Darr gaya kya? Chal beer le aate hain!”

Jaise hi dono beer lene gate tak pahuche, gate ke upar ka bulb toot kar seedha unke paas gira.
Thoda bache, thoda hilke beer leke wapas aaye. Kuch samajh nahi aaya, par beer pi, aur thake haar bed par so gaye.

Raat ke 2 baje:
Zor ka awaaz hua – fan toot kar seedha roommate ke chaati par gira!
Purana fan tha, bhaari tha – dard bhi hua aur shock bhi. Roommate chilla ke utha, aur ab usse pakka yakin ho gaya – kuch toh gadbad hai.

Jaise hi bed ke paas dekha, ek ladki ki lipstick mili.
Usne dost se pucha – “Ye lipstick kiski hai bhai?”
Dost ne casually bola – “Arey, wo meri gf aayi thi kuch din pehle, uski hogi.”

Bas itna sunna tha ki ek kaali parchai saamne ke kone mein dikhi – aur woh zor se chillayi!

Dono room se chaddi-baniyan mein bhaag ke neeche aaye, itne zor se ki neeche ke log bhi jag gaye.
Makan malik aur unki do betiyan bhi aa gayi – jinpe dono roommate line maarte rehte the.

Makan malik ne gusse mein pucha – “Kya hua?”
Toh dono ne ro-ro ke poori kahaani batai.

Malik ne thandi saans le ke kaha,
“Beta, is flat mein ek nahi, do aatmaayein rehti hain. Ek ladki ne yahaan suicide kiya tha, uska bf use yahaan chhod ke chala gaya tha. Tab se uski aatma yahaan bhatakti hai.
Doosri aatma ka hume ab tak kuch pata nahi, par woh kabhi kisi ko nuksan nahi pahuchati. Shayad usi ne tumhe fan aur gate se bachaaya ho.”

Dono shocked.
“Ye sab aapko pehle se pata tha?”
Malik: “Haan, par tum log itne confident the toh socha bataane ka kya faayda?”

Tab mera dost gusse mein roommate par chillaaya –
“Tere gf ke makeup aur lipstick ki mehek ne puri shanti bhang kar di. Ye sab usi ka asar hai!”

Aakhir mein dono chaddi-baniyan mein Malik ke guest room mein so gaye.
Upar kapde lene ki himmat nahi thi… aur neeche makan malik ki betiyan khade hoke has rahi thi.

Agle din se dono ne flat chhod diya… aur biryani se bhi!

---

Moral of the Story:

Roommate ke sath rehna cool hai, par agar lipstick dikhe toh samajh jao… kuch toh bhoot-pret ka kissa zarur hoga! 😅👻

gar aapko kahani pasand aayi ho toh like, comment aur follow zarur karein!  

Aisi aur horror-comedy kahaniyon ke liye jude rahiye mere blog ke saath – naye twists har hafte!